काठमाडौं – गैरआवासीय नेपाली संघ (एनआरएनए) को नव-निर्वाचित समितिले हालै एनआरएनए अन्तर्राष्ट्रिय समन्वय परिषद् (आईसीसी) का निवर्तमान अध्यक्षलाई सम्मानपूर्वक बिदाइ तथा सम्मान भोज आयोजना गरेको छ। डेलिश ओपेरा रेस्टो एन्ड ब्याङ्क्वेटमा आयोजित उक्त कार्यक्रम नयाँ समितिद्वारा आयोजना गरिएको थियो, जसको अध्यक्षता अध्यक्ष डा. हेमराज शर्माले गरेका थिए। कार्यक्रमको खर्च समिति सदस्यहरूले आफैंले व्यहोरेका थिए भने वरिष्ठ उपाध्यक्ष रबिन प्रसाद शेरचन मुख्य प्रायोजक रहेका थिए।
कार्यक्रमको कुशल सञ्चालन महासचिव डा. चिरञ्जीवी खड्का र प्रवक्ता सोम सापकोटाले गरेका थिए, जसले सम्पूर्ण कार्यक्रमलाई सहज र आत्मीय बनाएको थियो। संस्थापक अध्यक्ष डा. उपेन्द्र महतो, पूर्व अध्यक्षहरू जीबा लामिछाने र आर.के. शर्मा लगायत अन्य विशिष्ट व्यक्तित्वहरूको उपस्थिति रहेको थियो। नव-निर्वाचित सम्पूर्ण टोली, एनआरएनए सचिवालयका कर्मचारीहरू तथा सीईओ राजेन्द्र राहत पनि कार्यक्रममा सहभागी थिए।
आफ्नो सम्बोधनमा अध्यक्ष डा. हेमराज शर्माले पूर्व अध्यक्षहरू डा. बद्री केसी र महेश श्रेष्ठ, सम्पूर्ण पूर्व अध्यक्षहरू, संस्थापक अध्यक्ष, निर्वाचन समिति, स्टेयरिङ समिति तथा १२औं एकता महासभा सफल बनाउन योगदान पुर्याउने सबैप्रति आभार व्यक्त गरे। साथै उनले नेपाल सरकार, परराष्ट्र मन्त्रालय, विश्वभरिका प्रतिनिधिहरू र सम्पूर्ण एनआरएनए परिवारलाई निरन्तर सहयोगका लागि धन्यवाद दिए।
उनले कार्यक्रमको अवधारणा ल्याउने राधिका ( टिका ) गुरुङ लाई विशेष धन्यवाद दिएका थिए भने महेश श्रेष्ठकी पत्नी सर्मिला श्रेष्ठको अथक सहयोग र समर्पणको प्रशंसा गरेका थिए। उनले कार्यक्रममा अभूतपूर्व एकताको अनुभव भएको उल्लेख गर्दै भने, “एनआरएनएमा कोही पनि छुटेका छैनन्, यो साँच्चिकै अनौठो एकता हो।” उनले नयाँ समितिले यस एकतालाई कायम राख्दै एनआरएनएको अन्तर्राष्ट्रिय छवि अझ सुदृढ बनाउने प्रतिबद्धता जनाए।
कार्यक्रममा पूर्व अध्यक्षहरू डा. बद्री केसी र महेश श्रेष्ठलाई मायाको चिनो प्रदान गरी सम्मान गरिएको थियो, साथै सीईओ राजेन्द्र राहतलाई पनि सम्मान गरिएको थियो। एनआरएनए सचिवालयका सम्पूर्ण कर्मचारीहरूलाई पनि उनीहरूको समर्पण र योगदानको कदरस्वरूप मायाको चिनो प्रदान गरिएको थियो। सम्मान महासचिव डा. चिरञ्जीवी खड्काले प्रदान गरेका थिए।
कार्यक्रममा बोल्दै महेश श्रेष्ठले नयाँ टोलीलाई बधाई दिँदै सफलताको कामना गरे र यसलाई एनआरएनएको नयाँ युगको सुरुवातको रूपमा व्याख्या गरे।
डा. बद्री केसीले आफ्नो कार्यकालको समीक्षा गर्दै संवाद समिति तथा एकता स्थापित गर्न योगदान पुर्याउने सबैलाई धन्यवाद दिए। उनले समिति केही ठूलो भए पनि महत्वपूर्ण कुरा आकार नभई एकता भएको उल्लेख गर्दै आफू सधैं एनआरएनएको साधारण सदस्यको रूपमा सहयोग गरिरहने प्रतिबद्धता व्यक्त गरे।
